Psa 103 | MEU | STEP | Laumagu e, Iehova ba hanamoa; lalogu idoinai, ia ladana helaḡana ba hanamoa.

Psalms 103

1 Laumagu e, Iehova ba hanamoa;
lalogu idoinai, ia ladana helaḡana ba hanamoa.
2 Laumagu e, Iehova ba hanamoa;
ena harihari-bada iboudiai na basio lalo boio.
3 Ia ese emu kara dikadia iboudiai e gwau taomu,
ia ese emu gorere iboudiai lalodia amo e hamaurimumu.
4 Emu mauri ia ese mase gurina amo e rauaiamu,
ia ese oi kwaramu na heuraheni bona hebogahisi e havavalaiamu.
5 Emu goada na ia ese ḡau namodia amo e ubuamu;
una dainai emu eregabe na e hamatamataiamu ugava na heto.
6 Daḡedaḡe ese vada e hadikadia taudia iboudiai na
Iehova ese e kara maoromaoro henidiamu,
bona e hahemaoro henidia ḡoevaḡoevamu.
7 Ia ese ena dala na Mose e hadibalaia,
ena kara danu Israel taudia e hadibalaidia.
8 Iehova na mai ena hebogahisi bona mai ena harihari-bada;
ena badu na e halahemu, ena hebogahisi na e honu honu daemu.
9 Ia na basine gwau henida hanaihanai,
ena badu na basine mia hanaihanai.
10 Eda kara dika heḡereḡeredia se kara henidamu,
eda kara havara na davadia se henidamu.
11 Badina be guba bona tanobada padadia na bada herea heḡereḡerena,
iena hebogahisi na unu e bada tomamu ia garina e garimu taudia ediai;
12 laurabada kahana bona lahara kahana padadia edia daudau heḡereḡerena,
eda kara dika na ita eda amo unu e abidia oho tomamu.
13 Tamana ese natuna e bogadia hisimu heḡereḡerena,
Iehova ese ia garina e garimu taudia na unu e bogadia hisi tomamu.
14 Badina be ede e karada toma na ia dibana;
ia vada e helalo une, ita na tano ḡahuna mo.

15 Taunimanima ena mauri dinadia na rei na heto,
au heraheradia na heheto e tubumu;
16 badina be lai e odaiamu, bena vada e boiomu;
ena gabu na basine itaia lou.
17 A Iehova ena hebogahisi na sene ereguna amo, doini mia,
bona baine mia ela bona hanaihanai,
ia garina e garimu taudia ediai;
ena kara maoromaoro danu,
uru gabedia ediai;
18 ena taravatu e badinaiamu taudia ediai,
bona ena haheḡani e lalo taomu bona e karamu taudia ediai.

19 Iehova ese ena terono na guba ai vada e hadaia;
ena basileia ese taunimanima iboudiai e lohiadiamu.
20 Iehova ena aneru, ia ba hanamoa;
umui goada taumui, ena hereva o badinamu,
bona erena o kamonaimu.
21 Ena tuari oreadia iboumui ai, Iehova ba hanamoa;
ena hesiai taumui, ena ura o karamu taumui.
22 Iehova ena karakara ḡaudia iboumui ai, ia ba hanamoa,
ia e lohiadiamu gabudia iboudiai lalodiai.
Laumagu e, Iehova ba hanamoa.